إجابات عن أسئلتكم الشائعة مع دكتورة ريهام الشال
في كل أسبوع، بنحاول نرد على أكبر عدد من الأسئلة اللي بتوصلنا منكم، لأننا بنقدّر قلقكم، وعايزين نساعدكم توصلوا لحلول علمية، واضحة، ومريحة.
تجيب عن الأسئلة الدكتورة ريهام الشال اخصائي طب وجراحات النساء والتجميل والحقن المجهري وتأخر الإنجاب. تعالوا نبدأ:
سؤال: بعد التبويض، نزل إفرازات بيضاء… طبيعي؟
نعم، طبيعي تمامًا.
بعد أيام التبويض، بتتغير طبيعة الإفرازات من الشفافة والسائلة إلى اللون الأبيض، وده جزء طبيعي من التغيرات الهرمونية اللي بتحصل في الدورة الشهرية.
سؤال: أنا غير متزوجة وعندي تأخر في الدورة، أعمل إيه؟
لما يحصل تأخر متكرر في الدورة لبنت غير متزوجة، لازم نفكر في فحص طبي.
ممكن يكون السبب هرموني، أو مشاكل موضعية. نحتاج تحاليل وسونار علشان نحدد السبب ونعالجه قبل ما يسبب مشاكل تانية في الهرمونات.
سؤال: عندي حبوب في وشي والدورة غير منتظمة، ليه؟
الحبوب مع اضطراب الدورة غالبًا بيكونوا بسبب خلل في الهرمونات.
نحتاج نضبط الدورة الأول، وبعد كده نشوف لو فيه حاجة جلدية تستدعي تدخل من طبيب جلدية.
سؤال: بعد حمل خارج الرحم، مفيش حمل من 4 شهور، أعمل إيه؟
اطمني، 4 شهور مش فترة طويلة للقلق.
بس مهم نتابع التبويض ونتأكد إن العلاقة بتحصل في التوقيت الصح.
لو فاتت سنة بدون حمل رغم انتظام الدورة والفحوصات، وقتها نبدأ نفكر في وسائل مساعدة زي الحقن المجهري.
سؤال: أنا عندي 14 سنة وبطني بتؤلمني كأنه بداية دورة، ومفيش دورة!
محتاجين نعرف إذا كانت أول دورة جات ولا لأ.
لو مفيش دورة خالص، وجع البطن ممكن يكون علامة إن الدورة قربت.
لكن لازم فحص طبي لو الموضوع اتكرر أو استمر فترة طويلة.
سؤال: نزل دم في الحمل الثالث، أعمل إيه؟
اتصلي بطبيبك فورًا.
أي نزيف في الحمل لازم يتشاف بشكل عاجل، لأن الطبيب اللي متابع حالتك هو أكتر حد يقدر يطمنك ويوجهك.
سؤال: عندي آلام متكررة في بطني وجالي كيس دموي، إزاي أتصرف؟
الأكياس الدموية لازم تتشاف بالسونار، لأن بعضها بيختفي لوحده، وبعضها يحتاج علاج.
مش كل كيس خطر، لكن لازم تقييم من طبيبك.
سؤال أخير: إمتى أقدر آخذ أوميغا 3 في الحمل؟
ممكن من أول الحمل، وخصوصًا لو مش بتاكلي وجبتين سمك في الأسبوع.
الأوميغا 3 مهم جدًا لتغذية الجنين ونموه العقلي.
للمزيد من المقالات عن التشنج المهبلي وصعوبات العلاقة: