الحقن المجهري مش وعد بالحمل… بس دايمًا فيه أمل!
ناس كتير بتدخل تجربة الحقن المجهري وهي متخيلة إنه الحل السحري، وإنه “لازم يحصل حمل”. بس الحقيقة اللي لازم كل واحدة تعرفها: الحقن المجهري مش وعد بالحمل، هو وسيلة من وسائل كتير بنستخدمها، لكن النتيجة دايمًا في علم الغيب، عند ربنا.
تعالوا نحكي القصة دي، اللي حصلت مع واحدة من حالات دكتورة ريهام الشال اخصائي طب وجراحات النساء والتوليد والحقن المجهري وتأخر الإنجاب.
خمس سنين انتظار.
من سنة 2021 وهي بتحاول، خمس سنين تأخر حمل. واحدة من قنوات فالوب عندها كانت مسدودة تمامًا، والتانية شغالة بنسبة، لكن المبيض نفسه كان استجابته ضعيفة جدًا للمنشطات. عندها تكيس عنيف على المبايض، وكنا خايفين من فرط التنشيط. فضلنا نشتغل بحذر لحد ما جه وقت الحقن المجهري.
بدأنا، جمدنا أجنة
ربنا أكرمنا في التجربة الأولى وطلعنا بثمان أجنة ممتازين، قسمناهم أربعة وأربعة. وقلنا نبدأ بدفعة… رجّعنا أول أربعة. استنينا التحليل… النتيجة كانت سلبية. ما حصلش حمل.
الصدمة الأولى.
زي أي أم منتظرة، كان الإحباط كبير، خصوصًا إن الكل حواليها قالها: “المرة التانية أكيد هتحملي”.
رجّعنا الأربعة التانيين. كانت حاطة أمل كبير، وحاسة بكل أعراض الحمل… بس برضو، النتيجة طلعت سلبية. ما حصلش حمل.
لمشاهدة الفيديو من هنا: https://youtu.be/RwOtP7OWNhc?si=nCcawU-2Qz7OsYKO
رجعت تاني؟ أيوة، ورجعت لنفس الدكتور!
رغم الإحباط، رجعت بعد سنة، وقالت: “أنا واثقة في حضرتك، وهعيد التجربة”. القرار كان مفاجئ، بس صدقًا، أوقات ثقة المريضة بتكون دافع كبير.
بس قبل ما نبدأ الحقن المجهري من أول وجديد، قررنا نجرب حاجة بسيطة.
قلنا ندي دورة منشطات خفيفة، ونرصد التبويض على المبيض السليم، من غير أي ضغوط ولا انتظار ولا تخطيط لحاجة. ندي فرصة طبيعية، وخلاص.
والمفاجأة…
بعد أسبوعين، عملنا اختبار حمل… والنتيجة كانت “إيجابية”!
الحمل حصل طبيعي، رغم كل المشاكل الطبية السابقة. لا حقن مجهري، لا عمليات، لا صنارات. بس منشط خفيف، وتوفيق من ربنا.
والمفاجأة الأكبر؟ مش حمل عادي… دا حمل بتوأم!
ربنا عوّضها بعد ست سنين صبر.
الفرحة كانت كبيرة، مش بس لأنها حملت، لكن لأنها حملت في الوقت اللي كانت ناسية فيه كل حاجة. ماكنتش حتى متوقعة، كانت بتعيش حياتها عادي، سافرت، خرجت، عيدت، ورجعت تلاقي نفسها حامل بتوأم.
سبحان الله، كأن ربنا اختار الوقت المناسب ليها، اللي فعلاً كانت جاهزة فيه من كل النواحي.
في النهاية..
الحقن المجهري مش وعد بالحمل. هو مجرد وسيلة. وفيه حالات كتير فشل معاهم الحقن، لكن ربنا أكرمهم بحمل طبيعي. مش لأنهم عملوا مجهود فوق طاقتهم، لا… لكن لأنهم استسلموا لتوقيت ربنا، واهتموا بأبسط الحاجات، زي المتابعة، والمنشطات الخفيفة، والدعم النفسي.
رسالة أخيرة لكل اللي بتقرأ دلوقتي: لو عديتي بتجربة صعبة، أو حسيتِ إن مافيش أمل، اعرفي إن في وقت مخصص ليكي… ربنا كاتبه من زمان.
ولو بتاعني من تأخر الإنجاب، جمعنا لك هنا كل الموضوعات الخاصة بتأخر الحمل في دورس مفصلة بمعلومات علمية موثقة ومرتبة، علشان نساعدك توصلي لحلم الأمومة اللي تستحقيه:
رسالة لكي من بطلات سبقوكي لتحقيق حلم أمومتهم – TBIBTY طبيبتي