الفرق بين التلقيح الصناعي والحقن المجهري وأطفال الأنابيب: أيهم يناسب حالتك؟
في رحلة علاج تأخر الإنجاب، كتير من الأزواج بيتسألوا: “إيه الفرق بين التلقيح الصناعي، والحقن المجهري، وأطفال الأنابيب؟ وإمتى نختار ده أو ده؟ وهل فيه فرق كبير بينهم ولا مجرد اختلاف في الأسامي؟”
النهاردة هنتكلم مع بعض ببساطة عن كل إجراء فيهم، ونفهم ليه بيتعمل، وإمتى، ولمين.
أولاً: التلقيح الصناعي… أبسط طرق الإخصاب المساعد
التلقيح الصناعي هو أحد أساليب الإخصاب المساعد، لكنه أبسطهم. وبنتعامل فيه مع حالتين:
1. تحضير البويضات عن طريق منشطات ومتابعة تبويض بالسونار.
2. استعداد الحيوانات المنوية عن طريق تنقيتها وتجهيزها.
بعد ما نوصل بحجم البويضة ما بين 18 لـ22 مم، ويفضل لو في أكتر من بويضة علشان تزود فرص النجاح، بيتم إدخال الحيوانات المنوية جوه تجويف عنق الرحم مباشرة باستخدام قسطرة رفيعة.
هنا، إحنا ما سحبناش البويضات ولا لمسناها، إحنا بس قربنا المسافة على الحيوانات المنوية عشان ما تعديش الرحلة الطويلة، وده بيساعد على زيادة فرص حدوث الإخصاب الطبيعي داخل الجسم، من غير أي تدخل مباشر في البويضة.
لكن علشان التلقيح الصناعي ينجح، لازم تتوافر شروط معينة:
• قنوات فالوب تكون سليمة ومفتوحة.
• الحيوانات المنوية تكون بحركة وجودة معقولة.
• البويضات تكون جاهزة.
لو الحيوانات المنوية ضعيفة أو فيها تشوهات كتير، هل هتقدر تقطع المشوار الباقي وتخصب البويضة؟ لا. علشان كده، مش دايمًا التلقيح الصناعي بينفع في كل الحالات.
ثانيًا: الحقن المجهري… خطوة متقدمة لما الشروط مش مكتملة
لو الأنابيب مسدودة، أو عدد وجودة البويضات ضعيفة، أو الحيوانات المنوية فيها مشكلة كبيرة، بنروح على الحقن المجهري.
الخطوات بتبدأ بتحفيز التبويض باستخدام بروتوكول دوائي قوي، بنسميه “فرض تنشيط متحكم فيه”، علشان نطلع أكبر عدد ممكن من البويضات. وبعد كده، بنسحب البويضات من المبيض باستخدام إبرة دقيقة عبر المهبل وتحت السونار.
في الوقت ده، بناخد عينة الحيوانات المنوية، نختار منها الأفضل، ونبدأ في عملية الحقن.
الحقن المجهري ولا أطفال الأنابيب؟ إيه الفرق؟
الحقن المجهري وأطفال الأنابيب هما نوعين من طرق الإخصاب داخل المعمل:
• في الحقن المجهري، بنمسك الحيوان المنوي ونحقنه مباشرة جوه البويضة.
• في أطفال الأنابيب، بنحط الحيوان المنوي جنب البويضة، ونسيبه يحاول يخصبها بنفسه.
الاختيار بين الطريقتين بيحدده فريق المعمل بناءً على حالة الحيوانات المنوية، وعدد البويضات، وتاريخ الحالة.
يعني من ناحيتك كزوجة، الخطوات واحدة، لكن الفرق بيحصل في طريقة التعامل داخل المعمل.
لمشاهدة الفيديو من هنا: https://youtu.be/BhNFF3yQ12c?si=dXpNNYbDbORLRTrW
إمتى نلجأ لكل إجراء؟
• التلقيح الصناعي: لما يكون في مشكلة بسيطة في الحيوانات المنوية، أو في سبب غير معروف لتأخر الإنجاب، وحالة الأنابيب والبويضات كويسة.
• الحقن المجهري: لما تكون الأنابيب مسدودة، أو الحيوانات المنوية ضعيفة جدًا، أو عدد البويضات قليل.
• أطفال الأنابيب: لما تكون الحيوانات المنوية قادرة تتحرك وتخترق البويضة، ولكن نحتاج لمساعدة خارجية لزيادة فرص الإخصاب.
طيب نسب النجاح؟
نسب نجاح الحقن المجهري أعلى من التلقيح الصناعي، ويمكن توصل للضعف. لكن في النهاية، الموضوع كله بيد ربنا سبحانه وتعالى. إحنا مجرد أسباب، بنحاول، وبنختار الطريق المناسب، وربنا هو اللي بيكتب النتيجة.
ولو بتاعني من تأخر الإنجاب، جمعنا لك هنا كل الموضوعات الخاصة بتأخر الحمل في دورس مفصلة بمعلومات علمية موثقة ومرتبة، علشان نساعدك توصلي لحلم الأمومة اللي تستحقيه:
ورسالة لكي من بطلات سبقوكي لتحقيق حلم أمومتهم – TBIBTY طبيبتي