تثقيب المبيض بالمنظار: الحل الأخير لعلاج تكيس المبايض؟
أنا جايالكم النهاردة علشان أتكلم عن حاجة بتشغل تفكير بنات كتير جدًا، خصوصًا اللي بيعانوا من تأخر الحمل بسبب تكيس المبايض، وهي عملية تثقيب المبيض بالمنظار. هنتكلم عن كل حاجة بالتفصيل: يعني إيه؟ ليه بنعمله؟ إمتى نعمله؟ إمتى ما نعملوش؟ إيه مخاطره؟ وإيه البدائل؟ وهل فعلاً بيفيد ولا لأ؟ تابعيني للآخر لأن الفيديو أو المقال ده هيكون مرجع أساسي ليكي لو بتفكري في الإجراء ده.
أولاً: يعني إيه تكيس مبايض؟
تكيس المبايض مش مجرد كيس أو اتنين على المبيض. ده متلازمة فيها خلل في الهرمونات، وده بيأثر على:
• الدورة الشهرية: مواعيدها بتتلخبط أو ممكن تختفي.
• شكل الجسم والجلد: زي زيادة الوزن أو حب الشباب.
• شكل المبيض نفسه: بيكبر ويتضخم، لدرجة إنه يوصل لحجم نص كف الإيد تقريبًا!
وبيظهر عليه أكياس صغيرة جدًا، أقل من 9 ملم، منتشرة في المبيض بالكامل، وبنقول ساعتها إنه “مبيض متعدد الأكياس”.
طيب هل التكيس درجات؟
أيوه، تكيس المبايض درجات:
1. بسيطة: بنقدر نتعامل معاها بأدوية بسيطة، وفي حالات بتحمل طبيعي من غير تدخلات.
2. متوسطة: بنحتاج فيها جرعات تنشيط.
3. عنيفة: وهنا بتبدأ المشكلة، لأن الجسم مش بيستجيب للأدوية، وبيحصل مقاومة للمنشطات.
يعني إيه مقاومة للمنشطات؟
ده معناه إننا بندي أدوية تنشيط تبويض والمبيض مش بيستجيب. بنسمي ده Clomiphene Resistance. وقتها لازم نلجأ لحلول أقوى، ومن هنا ظهر موضوع تثقيب المبيض بالمنظار.
لمشاهدة الفيديو من هنا: https://youtu.be/2Lw6HijilVU?si=-ekMBW2_X-1xYtoM
يعني إيه تثقيب المبيض؟ وإزاي بيتعمل؟
هل لازم نفتح بطننا جراحة كبيرة؟ لا خالص. فيه حاجة اسمها المنظار. بندخل من فتحات صغيرة في البطن، ونوصل للمبيض ونعمل فيه ثقوب صغيرة باستخدام الحرارة. العملية دي بتقلل من نشاط إنزيمات معينة، وبتساعد المبيض إنه يبدأ يستجيب للمنشطات بشكل أفضل.
لو حاسة الموضوع غريب؟ طيب فكري فيها زي الدرما رولر اللي بنستخدمها للبشرة، بتحفز تجديد الخلايا، وتخلي البشرة تستجيب بشكل أحسن.
هل فعلاً الإجراء ده بيساعد؟
أيوه، فعليًا حالات كتير حصلها حمل بعد التثقيب بنسبة نجاح وصلت لـ 89%، وده رقم كبير جدًا! معظم البنات اللي بيعملوه، لو ما حصلش حمل خلال 6 شهور، بيعيدوا التثقيب، لكن في الغالب الحمل بيحصل طبيعي بعد العملية.
طب هل في مضاعفات؟
أكيد! مافيش إجراء طبي من غير مضاعفات.
• هو منظار جراحي: يعني فيه فتحات صغيرة بندخل منها أدوات، وده ممكن يسبب ألم أو عدوى.
• احتمالية التصاقات: الثقوب اللي بنعملها في المبيض ممكن تخليه “يخشن” شوية، وبالتالي يلتصق بجدار البطن أو الأمعاء.
• الخطر الأكبر؟ إننا نعمل ثقوب كتير أو عميقة جدًا، وبدل ما نعالج المشكلة، نبوّظ المبيض ونقلل فرص الحمل.
يعني لازم نكون دقيقين؟ جداً جداً! مش كل حالة ينفع تعمل تثقيب مبيض.
• لازم نقيم الحالة صح.
• نعرف هل المخزون عالي؟ زي ما قالت بنت بتحكي تجربتها وتحليلها طلع أكتر من 9.
• لازم نكون جربنا كل الحلول التانية قبل ما نوصل للمنظار.
• ونتأكد إن الزوج تحاليله كويسة.
طب لو الحالة ما تستحقش تثقيب؟
هنا بنلجأ لبدائل آمنة أكتر:
• بروتوكولات تنشيط مختلفة.
• أدوية جديدة تشتغل على الجسم ككل، مش بس على المبيض.
• نختار البروتوكول المناسب حسب درجة مقاومة الجسم وطول نفس الحالة واستعدادها للعلاج.
نصيحتي ليكي:
افهمي حالتك كويس. هل فعلاً محتاجة تثقيب مبيض؟ ولا ممكن نحلها بطرق أقل تدخلاً؟ ما تمشيش ورا أي قرار من غير ما تكوني مقتنعة تمامًا.
اعملي استشارة صح، خدي كل تحاليلك، واحكي لطبيبك التاريخ الطبي بالكامل. لما توصلي للقرار، لازم تكوني فاهمة:
ليه هنعمل كده؟ هنستفيد إيه؟ ونتوقع إيه بعده؟
وفي الختام…
تثقيب المبيض إجراء مفيد جدًا في حالات معينة، لكنه حساس جدًا ويحتاج دقة وقرار واعي. مشكلتك تستحق الاهتمام والتقييم الصح. وافهمي دايمًا إن فيه حلول تانية ممكن تكون أنسب وأسلم، ومش كل حالة زي التانية.
ولو بتاعني من تأخر الإنجاب، جمعنا لك هنا كل الموضوعات الخاصة بتأخر الحمل في دورس مفصلة بمعلومات علمية موثقة ومرتبة، علشان نساعدك توصلي لحلم الأمومة اللي تستحقيه:
رسالة لكي من بطلات سبقوكي لتحقيق حلم أمومتهم – TBIBTY طبيبتي