خلطة السمسم والقرنفل: هل هي فعلاً مفتاح الحمل؟ ولا فخ سوشيال ميديا؟
خلاص السوشيال ميديا وصلت لمرحلة بتقولنا فيها إن في خلطة سحرية للحمل! مفيش داعي نروح لدكاترة، ولا نعمل فحوصات، ولا نضيع سنين في التحاليل والعلاج… الحل هو ببساطة: سمسم + قرنفل = حمل سريع جدًا، ويمكن كمان توائم!
طيب تعالوا نهدى ونفكر، ليه كل الأطباء سكتوا عن الوصفة السحرية دي؟ وليه سايبينا “نعاني” على حد كلام الفيديوهات دي؟
الإجابة بكل بساطة: لأننا بنشتغل بالعلم، مش بالخيال.
المعلومة اللي ماحدش قالها: مش كل وصفة شعبيّة تنفع لكل الناس.
في موقع وقنوات طبيبتي لدكتورة ريهام الشال: إحنا بنراجع الأبحاث بشكل منتظم، بنقرأ، بنحلل، وبنشتري اشتراكات علمية عشان نوصّل لكل سيدة معلومة حديثة وصحيحة. وحتى لما نتكلم عن الأعشاب أو الطب البديل، بنقول الكلام ده بأساس علمي وبنوضح إمتى مفيد وإمتى ممكن يضر.
خليني أبدأ بالسمسم، اتكلمنا عنه من سنتين، وقلنا إنه مفيد في بعض الحالات، لكن كمان وضحنا إمتى لا ينفع.
بس اللي انتشر مؤخرًا إنك تحطي عليه قرنفل وهيحصل حمل سريع جدًا! هنا الموضوع دخل في دايرة خطيرة.
لمشاهدة الفيديو من هنا: https://youtu.be/DM87V3Vp4KA?si=BzadcKBOtD5XtOb8
القرنفل: فوائده حقيقية، بس مش آمن لكل الناس.
القرنفل فعلاً فيه مادة مخدرة، كتير مننا جربها وقت وجع الأسنان. كمان هو مضاد أكسدة قوي، وبيقلل الالتهابات، ومفيد في حالات تكيس المبايض وبطانة الرحم المهاجرة.
غير كده، عنده خواص مضادة للبكتيريا وبيستخدموه في تنظيف الجهاز الهضمي عند بعض الناس.
لكن! المشكلة الكبيرة بتيجي لما نستخدمه غلط أو من غير إشراف طبي.
القرنفل بيقلل سكر الدم بشكل كبير، وده ممكن يؤدي لهبوط خطير، خصوصًا عند مريضات السكر أو اللي بياخدوا إنسولين.
والأخطر؟ مادة الإيجنول اللي فيه، ودي مادة لو زادت في الجسم ممكن تسبب تسمم للكبد، الجهاز اللي المفروض بيحمينا من الأكسدة أصلاً!
عارفين فين الكارثة التانية؟
القرنفل ممكن يسبب تشنجات، وده خصوصًا عند الناس اللي عندهم تاريخ سابق حتى لو مش ظاهر.
غير كده، القرنفل بيزود سيولة الدم، وده بيخليني كطبيبة أوقف وأسأل كل حالة داخلة عملية: “أخدتي قرنفل؟”
لأن لو كانت بتاخد أدوية زي الأسبرين أو الكليكسان، ومعاهم قرنفل، ممكن ندخل في نزيف ما نعرفش نوقفه.
وبالمناسبة، القرنفل كمان ممكن يلخبط توازن السوائل في الجسم، فنلاقي التورم زاد أو حصل احتباس في السوائل.
فين الغلط الكبير؟
الناس بتشوف فيديوهات على السوشيال ميديا بتقول إن في حالات حملت بعد ما خدت الخلطة، بس مش بيشوفوا الجانب التاني: الحالات اللي حصل معاها مشاكل، مضاعفات، أو حتى أذى بدني حقيقي.
صدقيني، أكتر لحظة بتسعدنا كأطباء لما تجيلي حالة وتقول: “أنا حامل!” أو تبعتلي اختبار حمل إيجابي على الواتساب. اللحظة دي بتغيّر يومنا كله. فمش منطقي أبداً إننا نخبي وصفة سحرية كانت هتريح كل الناس.
الخلاصة؟
خلطة السمسم والقرنفل ممكن تكون مفيدة لبعض الناس، في بعض الأوقات، بس تحت إشراف طبي فقط.
ومش كل دكتور بيدّي أعشاب، لأن مش كل الأعشاب آمنة، ولا كل الحالات زي بعض.
حتى الأطباء اللي سُئلوا عن الخلطة دي قالوا: “إحنا ما نعرفش تأثيرها، ومش بننصح بحاجة ما وراهاش دليل علمي.”
الفيديو ده خَد منّا أسبوعين بحث علشان نقدر نقول الكلام ده. تعب ومجهود وساعات شغل عشان نوصل لك المعلومة بشكل دقيق، مش عشوائي.
ونصيحة من القلب:
لو استفدتي من الفيديو ده، ساعدي غيرك يستفيد. شيريه، أو اعملي لايك، عشان يوصل لناس أكتر.
إحنا هدفنا إننا نشوف أقل عدد ممكن من الحالات اللي بيحصل لها مضاعفات بسبب وصفات متداولة بشكل خاطئ.
ولو بتاعني من تأخر الإنجاب، جمعنا لك هنا كل الموضوعات الخاصة بتأخر الحمل في دورس مفصلة بمعلومات علمية موثقة ومرتبة، علشان نساعدك توصلي لحلم الأمومة اللي تستحقيه:
رسالة لكي من بطلات سبقوكي لتحقيق حلم أمومتهم – TBIBTY طبيبتي