علامات التبويض اللي لازم تكوني عارفاها علشان تزودي فرص الحمل
لو إنتي بتفكري في الحمل، مهم جدًا تبقي عارفة إمتى بيحصل التبويض، لأن دي الفترة اللي الخصوبة فيها بتكون في أعلى درجاتها، وفرص الحمل بتكون أكبر.
ووفقا الدكتورة ريهام الشال، أخصائية في طب وجراحة النساء والتوليد وتأخر الإنجاب، هنشرح لك دلوقتي أهم العلامات اللي تساعدك تتوقعي أيام التبويض بشكل أوضح.
يعني إيه تبويض؟
التبويض هو لما تخرج بويضة ناضجة من المبيض وتبقى جاهزة للتخصيب. البويضة دي بتعيش فترة قصيرة، علشان كده لو عرفنا توقيت التبويض بدقة وحدث اللقاء في الوقت ده، فرص الحمل بتزيد.
لمشاهدة الفيديو من هنا:
إزاي تعرفي أيام التبويض؟
أول حاجة ممكن تعمليها إنك تتابعي جسمك وتلاحظي التغييرات اللي بتحصل كل شهر، وتكتبيها في نوتة. الحاجات اللي ممكن تلاحظيها:
• عدد أيام الدورة الشهرية من أول يوم نزول الدم لحد بداية الدورة اللي بعدها.
• ارتفاع بسيط في درجة حرارة الجسم (حوالي نص درجة).
• مغص في الحوض، معروف باسم “ألم التبويض”.
• زيادة في الإفرازات المهبلية، بتكون أوضح وألزج.
• وجع أو انتفاخ في الثدي.
• تقلب مزاج، أو إحساس أقوى بالحواس زي الشم أو التذوق.
• زيادة في الشهية.
• نزول بقع دم بسيطة مش وقت الدورة.
لما تكتبي الحاجات دي كل شهر، هتبدأي تلاحظي نمط معين، وتقدري تتوقعي التبويض بشكل أدق مع الوقت.
هل في طريقة أدق؟
أيوه. في اختبار التبويض المنزلي اللي بيتباع في الصيدليات. الأفضل تبدأي تستخدميه من اليوم 12 من الدورة، لمدة 5 أيام تقريبًا (حسب انتظام دورتك).
خدي عينة البول أول ما تصحي الصبح علشان تكون النتيجة أدق.
لو الخط التاني طلع لونه زي الخط الأول أو أغمق، دي علامة إن التبويض قرب أو حصل.
طيب لو ما ظهرتش أي أعراض أو النتيجة طلعت سلبية؟
ده مش معناه إن مفيش تبويض. أحيانًا العلامات بتكون مش واضحة. التقييم الأدق بيكون عن طريق متابعة التبويض بالسونار عند دكتور النساء، ودي طريقة طبية دقيقة، لكن مش دايمًا متاحة لكل الناس.
التبويض بيكون إمتى غالبًا؟
• لو دورتك قصيرة (مثلاً 24 يوم)، ممكن التبويض يحصل بين اليوم 10 لليوم 12.
• لو دورتك طويلة (مثلاً 32 يوم)، ممكن يكون التبويض في اليوم 17 أو 18.
بس افتكري إن كل جسم له طبيعته، ومفيش قاعدة ثابتة لكل الناس.
نصيحة أخيرة
الدراسات بتقول إن حوالي 68٪ من السيدات بيحصل عندهم حمل خلال أول 3 شهور من الجواز، والنسبة بتوصل لـ81٪ بعد 6 شهور.
التبويض مهم، بس مش هو السبب الوحيد في الحمل. في عوامل تانية لازم تتظبط.
لو الوقت عدى ومفيش حمل رغم إنك بتتابعي التبويض، ممكن يبقى الوقت مناسب تروحي للدكتور علشان تعملي فحص دقيق يشوف حالتك الصحية والنفسية والاجتماعية.
ولو بتعاني من تأخر الإنجاب، جمعنا لك هنا كل المواضيع اللي تخص تأخر الحمل في دروس مفصلة بمعلومات علمية ومرتبة، تساعدك توصلي لحلم الأمومة اللي تستحقيه:
رسالة لكي من بطلات سبقوكي لتحقيق حلم أمومتهم – TBIBTY طبيبتي