كيف أحافظ على خصوبتي بعد سن الأربعين؟
جاءنا سؤال جميل من إحدى المتابعات تقول فيه:
“أنا امرأة عمري 41 سنة، كيف أحافظ على خصوبة الجهاز التناسلي للحمل؟”
تجيب دكتورة ريهام الشال، أخصائي طب وجراحات النساء والتوليد والحقن المجهري وتأخر الإنجاب: بصراحة، سؤال رائع جدًا، والإجابة عليه تهم كثير من السيدات، خصوصًا مع تأخر سن الزواج وانتشار الحمل بعد سن الأربعين.
لكن الحقيقة إننا نفضل نبدأ هذا الحوار قبل سن الأربعين بـ 5 أو 6 سنوات على الأقل، يعني من سن 35 لازم نكون بدأنا نعمل خطوات تحافظ على الجسم وعلى خصوبته.
طيب، ليه؟ لأن أساس كل ده هو “عُمر الخلايا”.
الخلايا اللي في جسمنا بتتأثر بأشياء كتير، في حاجات ممكن تخليها تتعب وتكبر قبل وقتها، وفي حاجات تقدر تحافظ عليها وتخليها تفضل شابة ونشيطة حتى لو كبرنا في السن.
أكيد كلنا بنلاحظ في حياتنا اليومية:
في ناس شكلهم في العشرينات وهم أصلًا في الثلاثينات أو الأربعينات، وناس تانية شكلهم أكبر من عمرهم بكتير.
الفرق هنا بيرجع لـ:
• الجينات
• التغذية
• الرياضة
• أسلوب الحياة
• وعُمر الخلايا وجودتها
وده كله بيأثر على خصوبة الجهاز التناسلي، وبالتالي على فرص الحمل.
لمشاهدة الفيديو من هنا: https://youtu.be/ozleUIW3YaM?si=Nx6axKUBtsPKFbAz
طب إزاي أحافظ على الخصوبة والجهاز التناسلي؟
وتضيف الدكتورة ريهام الشال: بما إن سن الزواج اتأخر، بقينا نشوف سيدات كتير بيحملوا بعد الأربعين.
وفيه طرق طبية للحفاظ على الخصوبة حتى قبل الزواج:
1. إجراءات طبية للحفاظ على البويضات
لو لسه ما تزوجتيش، ممكن نلجأ لطريقة نسحب بها البويضات ونخزنها، إزاي؟
نقوم بتنشيط المبيض وسحب البويضات وتجميدها، وده بيساعدنا نحتفظ ببويضات بجودة كويسة تقدر تساعدنا في المستقبل لو قررنا نعمل حقن مجهري.
2. الحفاظ على صحة الجهاز التناسلي الخارجي
كتير من السيدات بعد الأربعين بيعانوا من مشاكل زي:
• الترهلات
• التصبغات
• الجفاف في المناطق الحساسة
لكن دلوقتي بقى فيه ما يسمى بـ الطب التجميلي (Aesthetic Medicine)، واللي نقدر من خلاله نحافظ على نضارة هذه المنطقةونعالج أي مشاكل قد تؤثر نفسيًا أو جسديًا.
3. دعم المبيض والرحم
آه طبعًا، في طرق نقدر من خلالها نحافظ على وظيفة المبيض والرحم، زي تحسين الهرمونات وتنشيط الدورة الدموية وتحسين البيئة الداخلية اللي بتتكون فيها البويضات.
طيب الهرمونات… نعمل إيه؟
الهرمونات هي الرُسل الكيميائية اللي بتتنقل في جسمنا.
وللدهشة، نقدر نتحكم في تأثير هذه الهرمونات من خلال التغذية فقط!
أيوه، الغذاء السليم هو الأساس اللي بيحسن عمل الهرمونات، وبالتالي يحسن الخصوبة.
لكن، فيه سؤال دايمًا الناس بتسأله:
“والضغط النفسي (السترس)؟ إيه تأثيره؟”
الإجابة:
الضغط النفسي واحد، لكن طريقتنا في التعامل معاه هي اللي بتفرق من شخص للتاني.
يعني ممكن طفلين في نفس البيت، بيواجهوا نفس الظروف، لكن واحد بيتأثر بطريقة والتاني بطريقة تانية.
وده بيرجع بشكل كبير جدًا لطريقة تغذيته، والمغذيات اللي بياخدها جسمه.
حالة حقيقية:
جاتلي حالة سيدة عندها مشاكل كبيرة في البيت مع الزوج وأهله، وبتعاني من ضغط نفسي كبير، وبتدور على الحمل.
لما عملنا تحاليل، اكتشفنا إنها عندها نقص شديد جدًا في فيتامين دال.
بدأنا نعالج النقص ده، ونشتغل على نظام غذائي متكامل، ونمشي على خطة للحمل بعد الأربعين.
وبعد فترة، قالتلي:
“أنا بقيت حاسة بسلام وهدوء نفسي.”
سألتها:
“يعني المشاكل قلت؟”
ردت:
“لا، يمكن زادت! لكن أنا بقيت قادرة أتعامل معاها بشكل أحسن.”
هو ده اللي بنتكلم عنه!
التغذية والروتين اليومي هما الأساس
كل شيء في الجسم – من نفسيتك لقدرتك على الحركة والنشاط – بيتأثر بالتمثيل الغذائي، وبالعناصر اللي بنغذي بيها جسمنا.
إحنا ممكن نكون مكتئبين بسبب نقص فيتامين، مش بسبب ضغوط الحياة نفسها!
ممكن تكون مشاكل الهضم، أو نقص الحديد، أو ضعف الامتصاص، أو نقص أوميغا 3، هي اللي مأثرة على مزاجك، مش بس الضغط النفسي.
وعشان كده…
لو أنتِ في الثلاثينات أو الأربعينات وبتفكري في الحمل، أو حتى لو لسه متزوجتيش، مهم تفتحي ملف الخصوبة من دلوقتي.
ابدأي تخططي، واهتمي بالتغذية، وحافظي على نشاطك، وابعدي عن كل حاجة ممكن تسرق طاقة خلاياك.
الخصوبة مش بس حاجة بتتقرر يوم ما تقرري تحملي، دي رحلة بتبدأ من وعي مبكر، ومن نمط حياة متوازن.
ختامًا
كل سيدة تقدر تحافظ على خصوبتها، وكل واحدة ليها خطة مختلفة حسب حالتها، وده اللي بنشرحه بالتفصيل في خطة “الحمل بعد الأربعين”.
ادعوا لنا دايمًا، وشكرًا لكل واحدة بتهتم تسأل وتتعلم.
سلام كبير ليكم… ودعواتنا لكل من تتمنى الحمل.
ولو بتاعني من تأخر الإنجاب، جمعنا لك هنا كل الموضوعات الخاصة بتأخر الحمل في دورس مفصلة بمعلومات علمية موثقة ومرتبة، علشان نساعدك توصلي لحلم الأمومة اللي تستحقيه:
رسالة لكي من بطلات سبقوكي لتحقيق حلم أمومتهم – TBIBTY طبيبتي