لو بتحلمي بتوأم.. الحمل هيكون مختلف في 10 حاجات! جهزي نفسك صح
تخيلّي معايا، تسع شهور مرة واحدة، حمل مرة واحدة، ولادة مرة واحدة، سهر عشر مرات – أقصد مرة واحدة برضو – وتربية مرة واحدة! حاجة كده تشبه المعجزة، ولا مش كده؟ لو نفسك في توأم، اكتبي بسرعة في الكومنت: “ادعولي يا بنات بالحمل في توأم”.
بس استني! قبل ما نرفع إيدينا وندعيلك من قلوبنا، لازم نكون صادقين معاكي. لازم تعرفي كل الحقيقة الطبية ورا حلم التوأم ده. وتقول د. ريهام الشال، أخصائي طب وجراحات النساء والتوليد وتأخر الإنجاب والحقن المجهري.
ليه الحمل بتوأم بيزيد بين 30 و40 سنة؟
لأن جسمنا في المرحلة دي بيكون أكثر عرضة لإنتاج عدد أكبر من البويضات. لكن ده لا يعني إن الحمل بتوأم مش بيحصل قبل التلاتين، أو إنه مستحيل بعد الأربعين! لأ، بيحصل. بس علمياً، فرص التوأم بتزيد مع التقدم في السن لحد معين.
في الحمل بتوأم.. كل حاجة “زيادة”
محتاجين نزوّد الفيتامينات، خصوصًا حمض الفوليك، سواء بالأدوية أو الأكل. لازم نهتم بجرعات الحديد والكالسيوم، لأن الاستهلاك هيكون أعلى بكتير من الحمل في طفل واحد.
لمشاهدة الفيديو من هنا: https://youtu.be/ZVu0BCDU6ic?si=xJFdna2-eaw8G4X1
زيارات أكتر وتحاليل أكتر وأشعة أكتر
ليه؟ لأننا عايزين نطمن على اتنين مش واحد! نطمن على نموهم، تطورهم، حالتهم الصحية. فحص السونار هيأخذ وقت أطول، والمتابعة لازم تكون دقيقة جدًا وبشكل متكرر. ده من أمانة الطبيب، إن فحص التوأم مش زي فحص الجنين الواحد.
أعراض الحمل.. مضاعفة؟ مش دايمًا
هرمون الحمل (HCG) بيزيد في الحمل بتوأم، وده ممكن يزود الغثيان الصباحي. بس دي مش قاعدة. ممكن سيدة حامل بتوأم وما تعانيش خالص، وممكن واحدة حامل بطفل واحد وتدخل في حالة Hyperemesis Gravidarum (القيق المستعصي). فـ ما تقلقيش، كل واحدة حالتها فريدة.
آلام مبكرة ومتزايدة
من الشهر السادس والسابع ممكن تحسي بأعراض كأنك في التاسع! آلام الظهر، الحوض، الإرهاق، كلها ممكن تيجي بدري شوية، وده طبيعي لأن فيه اتنين بيكبروا جواك.
نزول الدم أثناء الحمل
هل معناها إن الحمل خلاص؟ لأ! في حالات كتير جداً بنشوف فيها نزيف ومع ذلك الحمل بيكمل وبيعدي بسلام. زي حالة حقيقية لسيدة نزل عليها دم من أول يوم، وكانوا الدكاترة مش متفائلين. لكن ربنا أكرمها، وولدت في التامن، وجابت أحلى توأم!
الدروس هنا: الدم مش دايمًا نهاية، لكن محتاج تدخل ومتابعة.
تسمم الحمل وسكر الحمل
للأسف، فرصهم أعلى في الحمل بتوأم. فلازم نتابع ضغط الدم وسكر الحمل بشكل دوري. التحاليل المنتظمة ضرورية، علشان نطمن إنك وإجنتك بخير.
متلازمة “نقل الدم بين التوأم”
اسمها العلمي Twin-to-Twin Transfusion Syndrome. بتحصل لما التوأم يكونوا بيشاركوا نفس المشيمة، وبيحصل تبادل دم غير متوازن. واحد ياخد دم أكتر والتاني أقل. وده بيأثر على النمو، وقد يؤدي لفروق كبيرة في الحجم. بس لو تكتشف بدري، بنقدر نتدخل.
الولادة المبكرة
التوأم غالبًا بيتولدوا قبل التاسع. ليه؟ لأن الرحم بيوصل لأقصى تمدده في التامن تقريبًا. وده يخلي فرص الولادة المبكرة أعلى.
قيصرية ولا طبيعية؟
الحقيقة إن فرص الولادة القيصرية في التوأم أعلى. خصوصًا لو وضع الأجنة مش مناسب. أحيانًا واحد فيهم بيتولد طبيعي، والتاني نضطر نطلعه قيصري. ومع كده، في حالات كتير التوأم بيتولدوا طبيعي. بس لازم تكوني مستعدة لكل الاحتمالات.
⸻
أنواع التوأم
• متشابهين (Identical): بيكونوا من بويضة واحدة اتقسمت. غالبًا بيشاركوا مشيمة واحدة.
• غير متشابهين (Fraternal): من بويضتين مختلفتين. بيكون لكل واحد مشيمته وكيسه.
المعلومة دي مهمة جدًا لأنها بتأثر على المتابعة، والمضاعفات، وخطة الولادة.
ولو بتاعني من تأخر الإنجاب، جمعنا لك هنا كل الموضوعات الخاصة بتأخر الحمل في دورس مفصلة بمعلومات علمية موثقة ومرتبة، علشان نساعدك توصلي لحلم الأمومة اللي تستحقيه:
رسالة لكي من بطلات سبقوكي لتحقيق حلم أمومتهم – TBIBTY طبيبتي