ما الفرق بين ضعف التبويض وضعف مخزون التبويض؟
سؤال مهم بيتكرر كثيرًا من البنات والسيدات اللي بيدوروا على فهم أدق لجسمهم وصحتهم الإنجابية، وبيجينا دايمًا بصيغة:
“يا دكتورة، هو إيه الفرق بين ضعف التبويض وضعف مخزون التبويض؟”
النهاردة هنشرح الفرق بشكل واضح وبسيط، ومن غير أي تعقيد.
يلا جهزي ورقة وقلم لأن الكلام اللي هيتقال مهم جدًا، وممكن يغيّر نظرتك تمامًا لموضوع التبويض والخصوبة.
أنا معاكم، دكتورة ريهام الشال، أخصائي طب وجراحة النساء والتوليد وتأخر الإنجاب والحقن المجهري، وإحنا النهاردة مع بعض في “طبيبتي قالتلكم” — عيلتكم الكبيرة اللي بتهتم بصحتكم دايمًا.
نبدأ من الأول: يعني إيه مخزون التبويض؟
تخيلي إن عندك “فريزر” كبير في بيتك، مليان أكل وخير.
الفريزر ده هو مثال بسيط على مخزون التبويض اللي بتتولدي بيه.
أنتِ بتتولدي بعدد معين من البويضات، ومع الوقت العدد ده بيقل تدريجيًا.
لكن، عكس الفريزر الحقيقي، مخزون التبويض لما يفضى مش بيتملّي تاني.
يعني المخزون ده بيتأثر بالزمن وبالظروف اللي بيمر بيها الجسم.
اللي لازم نفهمه كويس إن المخزون شيء ثابت من ساعة ولادتنا، وبيقل مع الزمن أو نتيجة ظروف صحية معيّنة.
وده مش موضوعنا الأساسي النهاردة، بس مهم نكون فاهمينه علشان نكمّل الشرح.
لمشاهدة الفيديو من هنا: https://youtu.be/B17GQH8szi8?si=_tra2U6uI9T_Uopa
طيب، وإيه بقى هو ضعف التبويض؟
لو الفريزر اللي اتكلمنا عنه مليان أكل، هل ده معناه إن كل أكله طازج وجاهز للأكل؟
أكيد لأ. ممكن يكون الأكل قديم، أو مش بجودة كويسة. وممكن كمان نكون مش عارفين نطلّع الأكل ده من الفريزر أساسًا.
نفس الفكرة بالضبط في التبويض.
ضعف التبويض معناه إن المبيض مش قادر يطلّع بويضات بانتظام أو بكفاءة.
يعني ممكن المخزون يكون موجود، لكن التبويض نفسه ضعيف، أو بيحصل على فترات متباعدة، أو بيطلع بويضات غير ناضجة أو بجودة ضعيفة.
مثال يوضح الفرق:
• الفريزر مليان = عندك مخزون تبويض جيد
• بس مش عارفين نطلّع الأكل = ضعف في التبويض
• بنطلّع أكل بجودة سيئة = ضعف جودة البويضات
• الفريزر فاضي أصلاً = ضعف أو نفاد في مخزون التبويض
هل المثال واضح؟
كده نكون وضّحنا ببساطة الفرق الجوهري بين ضعف التبويض وضعف مخزون التبويض.
وافتكري دايمًا إن ضعف المخزون حاجة بتحتاج تصرف سريع، لأنها مسألة وقت، والمخزون كل ما الوقت عدى بيقل.
أما ضعف التبويض، فمش دايمًا مرتبط بالوقت، وممكن يكون موجود حتى عند بنات صغيرين، وده بيتوقف على عوامل تانية زي اضطرابات هرمونية أو مشاكل في وظائف المبيض.
طيب، ليه الموضوع ده مهم؟
لأن القرار الطبي في الحالتين مختلف تمامًا.
• في حالة ضعف مخزون التبويض، لازم نتحرك بسرعة علشان نحافظ على أي فرصة متاحة للإنجاب قبل ما الوقت يفوت.
• أما في حالة ضعف التبويض، ممكن نشتغل على تنظيم الدورة وتحفيز التبويض وتحسين جودة البويضات.
وفي نقطة مهمة جدًا حابة أقولها:
في دول كتير بره، قسموا تخصص النساء إلى قسمين:
١. تخصص النساء والولادة
٢. وتخصص الخصوبة وتأخر الإنجاب
وده لأن كل مجال فيهم له خصوصيته وقراراته الدقيقة.
وعشان كده، لما تروحي لدكتور، لازم يكون متخصص في تأخر الإنجاب أو عنده خبرة حقيقية في التعامل مع حالات ضعف المخزون أو التبويض، مش بس أي دكتور نساء وتوليد.
لأن القرار الغلط أو التأخير ممكن يضيع فرص حقيقية تكوني أم بسببها في يوم من الأيام.
ولو بتاعني من تأخر الإنجاب، جمعنا لك هنا كل الموضوعات الخاصة بتأخر الحمل في دورس مفصلة بمعلومات علمية موثقة ومرتبة، علشان نساعدك توصلي لحلم الأمومة اللي تستحقيه:
رسالة لكي من بطلات سبقوكي لتحقيق حلم أمومتهم – TBIBTY طبيبتي