هل تنشيط التبويض بالحقن والأدوية بيدمر مخزون المبيض؟ الحقيقة الكاملة
“اوعي تاخدي منشطة… دي هتخلصلك مخزون المبيض!”
أكيد سمعتِي الجملة دي قبل كده. وناس كتير بيكرروها وكأنها حقيقة علمية، لكن يا ترى… ده صح ولا غلط؟ وهل فعلاً المنشطات بتقلل المخزون؟ وإمتى يكون فيه داعي للقلق؟ خلينا نفهم الموضوع بشكل مبسط وعلمي.
دكتورة ريهام الشال اخصائي طب وجراحات النساء والتوليد والحقن المجهري وتأخر الإنجاب بتقول: لو إحنا فعلاً صدقنا الجملة دي، يبقى أول خطوة منطقية هي إننا نوقف المنشطات تمامًا. طب تعالوا نطبق ده على أرض الواقع، وناخد مثال من الحياة: سيدة ما أخدتش منشطات نهائي طول عمرها، ونشوف مخزون المبيض عندها في العشرينات وبعدين نقيسه تاني لما توصل الأربعين. ونشوف كمان كام مرة حملت، وكام طفل جابت خلال الفترة دي.
الغريب واللافت للنظر إن السيدة اللي ما حملتش غير مرة أو مرتين، أو يمكن ما حملتش خالص، غالبًا بنلاقي إن مخزونها قل بشكل ملحوظ مع تقدمها في السن. بينما السيدة اللي حملت ٥ أو ٦ أو حتى ٧ مرات في العشرين سنة دول، بنلاحظ إن عندها مخزون مبيض أحسن، رغم إنها مرت بتجارب حمل أكتر.
لمشاهدة الفيديو من هنا: https://youtu.be/O-U7MvHZm_M?si=Ow7Pr4bZk_uwpXfN
المقارنة دي بتكشف لنا معلومة مهمة: إن مخزون التبويض بيقل بشكل طبيعي مع كل دورة شهرية، مش علشان المنشطات. الجسم نفسه بيستهلك البويضات اللي مش بيتم تخصيبها، وده بيحصل سواء أخدنا منشطات أو لأ.
يعني هل معنى كده إن منشطات التبويض ما بتأثرش على مخزون المبيض؟
الإجابة ببساطة: أيوة، صح. المنشطات مش بتدمر المخزون. اللي بتعمله المنشطات إنها بتنشّط بويضات كانت في الأساس هتضيع، لأنها مش مستجيبة. فإحنا بنساعد الجسم إنه يستفيد منها قبل ما تضيع هدر، وبنزيد فرص الحمل، خصوصًا لما الوقت بقى عامل مهم.
طيب، هل معنى كده إننا بندافع عن المنشطات ونقول للكل يستخدمها؟
طبعًا لأ. إحنا مش بندافع عن أي دواء بدون داعي. المنشطات زي أي علاج، ليها وقت وليها استخدام، ومينفعش تتاخد بدون إشراف طبي. لكن مهم جدًا إننا نعرف إنها مش العدو، ومش سبب في استهلاك المخزون زي ما بيُقال.
باختصار، مش كل كلام بيتقال نصدقه. تنشيط التبويض بالحقن أو الأدوية ما بيدمرش مخزون المبيض، بالعكس ممكن يكون فرصة ذهبية للاستفادة من البويضات اللي كانت هتروح من غير فايدة. كل حالة ليها خصوصيتها، والطبيب هو الشخص الوحيد اللي يقدر يحدد المناسب ليكِ
ولو بتاعني من تأخر الإنجاب، جمعنا لك هنا كل الموضوعات الخاصة بتأخر الحمل في دورس مفصلة بمعلومات علمية موثقة ومرتبة، علشان نساعدك توصلي لحلم الأمومة اللي تستحقيه:
رسالة لكي من بطلات سبقوكي لتحقيق حلم أمومتهم – TBIBTY طبيبتي