هل صغر حجم البويضة يعني العقم؟
من الأسئلة اللي بنسمعها كتير جدًا، خصوصًا من البنات اللي بيبدأوا رحلة المتابعة مع دكتور النساء: “أنا بويضتي صغيرة… يعني كده عندي عقم؟ مش هقدر أخلف؟”. والحقيقة إن الإجابة على السؤال ده مش بسيطة زي ما الناس فاكرة، ولا هي مرعبة زي ما بيتهيأ لكتير من البنات.
مثل ما توضح دكتورة ريهام الشال اخصائي طب وجراحات النساء والتوليد والحقن المجهري وتأخر الإنجاب، أول حاجة لازم نفهمها هي إن البويضة بتمر بمراحل، زيها زي القمر! آه والله، الموضوع شبه القمر بالضبط. مرة تشوفيه هلال، ومرة نص دايرة، ومرة بدر كامل. فهل معنى إنك شفتِ القمر وهو هلال إنه مش هيكمل ويصير بدر؟ طبعًا لأ. نفس الفكرة مع البويضة.
البويضة بتبدأ صغيرة، وكل يوم بتكبر شوية بشوية. وفي وقت معين من الدورة، اللي هو عادة بين اليوم 10 لليوم 18 (وده بيختلف من واحدة للتانية)، بنبدأ نتابع التبويض علشان نعرف حجم البويضة وصل لفين. البويضة اللي نقدر نقول إنها “ناضجة” وجاهزة للتبويض بتكون في الغالب ما بين 18 لـ22 مللي. لكن لو جينا بدري قوي في الدورة وبصينا على المبيض، طبيعي هنلاقي البويضات لسه صغيرة، لأنهم لسه في البداية.
المشكلة بقى إن في بنات بتعمل سونار بدري، وييجي الدكتور أو حتى هما نفسهم يشوفوا إن “آه ده حجم البويضات صغير”، ويتخضوا. ويبدأ الخوف، والتوتر، والتفكير في العقم، وتأخر الحمل، وكل الهواجس اللي بتيجي في لحظة. بس محدش بيوقف يسأل: “إحنا أصلاً في أي يوم من الدورة؟” أو “إحنا متابعين تبويض ولا ده كشف عابر؟” أو “فيه أدوية اتاخدت؟ فيه منشطات؟ ولا دي دورة طبيعية؟”.
لمشاهدة الفيديو من هنا: https://youtu.be/f33x2VWbmFc?
الدكتورة اللي كانت بتشرح في الفيديو قالت كلام مهم جدًا، وهو إن كتير من الأطباء مش بيشرحوا التفاصيل دي لأنهم شايفين إنها مفهومة أو مش محتاجة شرح، بس الحقيقة إن البنات لازم تفهم. كل واحدة من حقها تعرف جسمها، وتفهم التغيرات اللي بتحصل فيه، وتبقى عارفة هي ماشية على أي أساس.
فيه سيدات بويضاتهم كانت صغيرة وقت الكشف، لكن لما بدأوا يتابعوا التبويض في الأيام الصح، لقوا البويضات كبرت، وبقت ناضجة، وحصل حمل طبيعي، وعادي جدًا! يعني الحجم الصغير في لحظة معينة مش معناه مشكلة، ومش معناه أبدًا إن فيه عقم.
الرسالة الأهم في كل ده هي إننا ما نحكمش على البويضة من لقطة واحدة. التبويض مش صورة واحدة، ده فيلم كامل. والمشهد الواحد ما يقدرش يشرح لنا القصة كلها.
فلو لقيتي حد بيقولك إن عندك مشكلة عشان حجم البويضة، اسأليه: “إحنا في أنهي يوم من الدورة؟ وإنت متابعتي كام يوم؟ وهل في منشطات؟” لأن التشخيص الصح محتاج متابعة، مش بس نظرة سريعة.
وأخيرًا، حطي في بالك دايمًا إن العقم كلمة كبيرة جدًا، وما تتقالش بسهولة. كلمة زي دي ممكن تكسر نفسية أي بنت أو زوجة، وعشان كده ما ينفعش نقولها بناءً على صورة أو سونار اتعمل في وقت غير مناسب. لازم يكون فيه تقييم كامل، ومتابعة، وفهم دقيق.
وخلّي بالك، اللي بيقولك “حطي بصلة وخدي مشروب سحري” مش بيساعدك. الطب له طريق، والمتابعة ليها خطوات، وخليكي ماشية مع دكتور فاهم، واعملي تحاليلك في وقتها، وخدي بالأسباب العلمية.
ربنا يطمّن قلوبكم جميعًا، وكل واحدة نفسها تبقى أم… ربنا يكتب لها الفرحة قريب جدًا.
ولو بتاعني من تأخر الإنجاب، جمعنا لك هنا كل الموضوعات الخاصة بتأخر الحمل في دورس مفصلة بمعلومات علمية موثقة ومرتبة، علشان نساعدك توصلي لحلم الأمومة اللي تستحقيه:
رسالة لكي من بطلات سبقوكي لتحقيق حلم أمومتهم – TBIBTY طبيبتي