هل ممكن يكون مخزون المبيض قليل في العشرينات؟! حكاية حقيقية هتغير فكرتك عن الخصوبة
كتير من البنات بيستغربوا لما يطلب منهم دكتور تحليل مخزون المبيض (AMH)، خصوصًا لو عمرهم في العشرينات. وساعات بنسمع جملة زي: “أنا لسه صغيرة، إزاي يكون عندي مشكلة؟!”
لكن الحقيقة إن العُمر لوحده مش كفاية علشان نحكم على القدرة الإنجابية. ومش كل اللي في العشرينات معناها إنهم في أمان.
العشرينات عمر مغري.. لكن مش دايمًا مطمئن
العشرينات عمر بيخلينا نحس إن لسه قدامنا وقت، وإن الحمل ممكن يحصل بسهولة. بس للأسف، ساعات بيكون فيه مشاكل مش باينة، ومش هنقدر نكتشفها غير بالتحاليل.
يعني لما بنت في 23 أو 25 سنة تيجي تقول: “أنا متأخرة في الحمل”، الناس حواليها ممكن ترد وتقول: “ليه مستعجلة؟ إنتي صغيرة!”
لكن للأسف الرد ده ممكن يضيّع على البنت فرص مهمة كانت ممكن تساعدها في الوقت المناسب.
قصة طبيبة شابة… وصدمة التحليل
من أقرب الحالات لقلبي كانت لبنت دكتورة، في أواخر العشرينات، متجوزة من 3 سنين، ولسه الحمل ما حصلش رغم المتابعة مع أطباء كتير.
ولما بدأت تتابع معانا أونلاين، كنا الفريق الوحيد اللي طلب منها تحليل مخزون المبيض.
وفوجئنا إن النتيجة طلعت 0.3 AMH، رقم قليل جدًا، أقل حتى من سيدات في الأربعينات!
الغريب إن محدش قبل كده فكر يطلب التحليل، لأن شكلها وصغر سنها ما كنوش بيدّوا انطباع إنها ممكن تكون عندها مشكلة.
لمشاهدة الفيديو من هنا : https://youtu.be/CWj5ALE2ys4?si=WRF1VRVgwAWvFqzk
القرار المصيري: نبدأ الحقن المجهري؟
بعد ما عرفنا النتيجة، المريضة خدت قرار شجاع وقالت: “أنا هبدأ حقن مجهري”.
وفعلاً بدأنا أول دورة، بس للأسف ما طلعش ولا جنين. رغم كده ما فقدناش الأمل، وقررنا نحضّر لدورة تانية، لكن بطريقة مختلفة وبخطوات أدق.
الدورة التانية… والأمل بيرجع
في الدورة التانية، استخدمنا بروتوكول مختلف واهتمينا بتحسين جودة البويضات بالفيتامينات والدعم المناسب.
قدرنا نسحب 8 بويضات، نصهم فاضي، بس النص التاني كان كويس، وده كان تقدم كبير. ورجعنا 3 أجنة.
والأجمل من كده؟ ربنا كَرَّمهم، وحصل الحمل، وجالهم بيبي زي القمر
المفاجأة كانت في التحليل اللي محدش طلبه
البنت دي قالت إنها كانت مرعوبة من نتيجة الـAMH، لأنه كان التحليل الوحيد اللي كشف المشكلة، رغم إن كل التحاليل التانية كانت كويسة.
وكل الأطباء اللي راحتلهم قبل كده قالوا: “إنتي صغيرة ومافيش حاجة”، ومحدش طلب منها تحليل مخزون المبيض.
لكن لما عملت التحليل معانا، الخطة اتغيرت تمامًا، وبقينا عارفين إحنا بنواجه إيه.
البويضة مش دايمًا بتطلع كويسة من أول مرة
في أول دورة طلعنا بويضات فاضية، وده بيحصل. بس ده مش معناه إن الأمل راح.
في الدورة اللي بعدها، حصل تحسن كبير، وطلعنا بويضات أفضل، واتكوّنوا أجنة، وحصل الحمل.
لو بتحلمي تكوني أم ولسه ما وصلتيش، تعالي شوفي بنفسك قصص نجاح ملهمة لعشرات السيدات اللي حققوا حلم الأمومة من خلال الحقن المجهري وتقنيات الإخصاب المساعد… يمكن تلاقي قصتك بينهم: رسالة لكي من بطلات نجاح الحقن المجهري – TBIBTY طبيبتي
كلمة من الزوجين
الزوج قال إنهم كانوا بيحاولوا يطمنوا بعض، وإنهم اتفقوا يكملوا المحاولة لآخر نفس.
وكان بيحاول يخفف عنها لأنها أكتر واحدة كانت بتتعب، لكن لما شافوا صورة البيبي في السونار، نسيوا كل التعب، وقالوا: “الحمد لله إننا ما استسلمناش”.
أما الزوجة، فحكت إنها كانت بتتفرج على فيديوهاتنا من أول جوازها، ولما قررت تبدأ المتابعة معانا، كانت متابعة كل تفصيلة، وسألت عن كل خطوة، لأنها عايزة تفهم جسمها كويس