٧ علامات بتقول إن حملك ممكن يتأخر… ولازم تبدأي بالفحص بدري
سواء كنتي لسه بنوتة أو متزوجة حديثًا، في علامات كتير بنشوفها حوالينا يوميًا ممكن تكون مؤشر إن الحمل ممكن يتأخر شوية. العلامات دي ما ينفعش نتجاهلها، بالعكس، هي بتقولنا “انتبهوا”، وبتطلب مننا نبدأ الفحص بدري عشان نعرف المشكلة من بدري ونحلها قبل ما تكبر.
تعالي نبدأ سوا ونشوف إيه هم السبع علامات دي، وإزاي ممكن كل وحدة فيهم تبقى إشارة مهمة.
1. عدم انتظام الدورة الشهرية
أول علامة كلنا بنلاحظها بسهولة. الدورة الشهرية لما تيجي في مواعيد متغيرة وغير متوقعة، ده بيكون علامة على وجود خلل في الهرمونات. وده مش معناه إن مفيش أمل أو إنك عقيم، لا طبعًا، بس بيقولنا إن الجسم مش منتظم في التبويض، وده بيأثر على فرص الحمل. كمان، لو فيه دم بينزل ما بين الدورات، لازم نتحرك فورًا ونتابع مع طبيبة مختصة، حتى لو كنتي بنوتة. لأن المشاكل الهرمونية أوقات بتبدأ بدري.
2. إفرازات لبنية من الثدي (حتى في البنات)
لو لقيتي إفرازات لونها أبيض أو لبني بتنزل من الثدي، وخصوصًا لو كنتي لسه مش متزوجة، فده ممكن يكون دليل على خلل في الغدة النخامية. أوقات بيكون بسيط ويتحل بأدوية بسيطة، وأوقات بيحتاج فحص دقيق أكتر. بس الأهم إنك ما تتجاهليش العلامة دي وتستني لما تزيد، كل ما بدأنا بدري، كل ما العلاج كان أسهل.
3. ظهور الشعر في أماكن غير معتادة (هيرشويتزم أو ترايكوسيز)
بنات كتير بيكون عندهم شعر زايد، خصوصًا في بلاد الشرق الأوسط وسلالة البحر المتوسط. وده طبيعي إلى حد كبير. لكن لو الشعر بدأ يظهر في أماكن ذكورية زي منطقة الشنب أو الدقن أو الصدر، وبقى كثيف وأسود وخشن، يبقى لازم ننتبه. دي حالة اسمها “هيرشويتزم” وبتكون غالبًا بسبب اضطرابات هرمونية، وممكن فعلاً تؤثر على التبويض وتؤدي لتأخر الحمل. فالمتابعة مهمة جدًا هنا.
لمشاهدة الفيديو من هنا: https://youtu.be/ZuE4qI7Q3-8?si=LpcdjNioxmIn4_q9
4. الزوج المدخن
دي نقطة بنغفل عنها كتير. كتير يقولوا “ما هو أبونا وجدي كانوا بيدخنوا وخلفوا ٩ أولاد”. بس الحقيقة العلمية بتقول إن التدخين بيأثر سلبًا على جودة الحيوانات المنوية، وبيقلل الخصوبة. يعني حتى لو الحمل حصل، فرص الإجهاض أو التشوهات ممكن تزيد. فلو الزوج مدخن، لازم نراجع ده بجدية ونتكلم معاه بهدوء ونفكر في بدائل صحية.
5. ألم شديد وقت أو بعد الدورة الشهرية
الألم اللي بييجي وقت الدورة مش لازم يكون طبيعي لمجرد إننا اتعودنا عليه. فيه فرق بين شوية مغص خفيف، وبين ألم عنيف يخليكي ما تعرفيش تنامي أو تعيشي يومك. ولو الألم مستمر حتى بعد ما الدورة تخلص، فده احتمال كبير يكون بسبب بطانة الرحم المهاجرة. وهي حالة مش نادرة، وبتأثر على الخصوبة لو ما اتعالجتش في وقتها.
6. صعوبات العلاقة الزوجية
موضوع حساس، لكن مهم جدًا. في حالات كتير من تأخر الحمل بيكون سببها مشاكل في العلاقة الزوجية، سواء من جهة الزوج أو الزوجة. ممكن يكون ألم، أو توتر نفسي، أو حتى عدم معرفة كافية. وده ما فيهوش أي خجل. التوجه لطبيب متخصص في المجال ده بيحل المشكلة بسهولة، لكن السكوت عنها ممكن يعطل حلم الأمومة من غير داعي.
7. تصديق الخرافات والعادات القديمة
“اشربي الخلطة دي”، “لو نامت على ضهرها بعد الجواز يحصل حمل”، “لو دخل عليها وهي صايمة يحصل مشكلة”… للأسف، كتير من البنات بيقعوا في فخ الخرافات والعلاجات الشعبية اللي ملهاش أي أساس علمي. بل بالعكس، أوقات بيكون فيها ضرر. في حالات كتير وصلتنا بعد ما اتعالجوا عند ناس مش متخصصين واتناولوا خلطات أعشاب أثرت عليهم سلبًا. لو هتستخدمي أعشاب أو وصفات طبيعية، لازم تكوني تحت إشراف طبي حقيقي، لأن حتى الطب البديل ليه قواعده.
وفي النهاية…
دول كانوا السبع علامات اللي لازم تاخدي بالك منهم. لو لقيتي واحدة أو أكتر منهم موجودة عندك، متقلقيش. مش معناها إن الحمل مش هيحصل، لكن معناها إن لازم نبدأ نتحرك ونفحص. كل يوم بيعدي من غير متابعة ممكن يأخر الحلم شوية، لكن المتابعة المبكرة بتقربك من طريق الأمومة.
ولو بتاعني من تأخر الإنجاب، جمعنا لك هنا كل الموضوعات الخاصة بتأخر الحمل في دورس مفصلة بمعلومات علمية موثقة ومرتبة، علشان نساعدك توصلي لحلم الأمومة اللي تستحقيه:
رسالة لكي من بطلات سبقوكي لتحقيق حلم أمومتهم – TBIBTY طبيبتي