القسط الهندي والحمل: فوائده ومخاطره… وإزاي تستخدميه صح ليكي ولزوجك؟
في مشوار تأخر الحمل، كتير من الستات بيلجأوا للأعشاب الطبيعية كأمل أخير، خصوصًا لما السنين تعدي من غير نتيجة. وسط الحكايات والتجارب، دايمًا بيظهر اسم “القسط الهندي” كعشبة سحرية، بيقولوا إنها ممكن تحل كل مشاكل الخصوبة.
بس هل فعلاً القسط الهندي الحل السحري؟ وهل فعلاً مفيد في كل الحالات؟ ولا ممكن يكون خطر لو استخدمناه غلط؟
إيه هو القسط الهندي؟ وليه بيستخدموه؟
توضح د. ريهام الشال، أخصائي طب وجراحات النساء والتوليد والحقن المجهري، القسط الهندي من الأعشاب المعروفة من زمان في الطب الشعبي، والدراسات الحديثة بدأت تثبت فوائده. من استخداماته الشائعة:
• بيهدّي مشاكل الجهاز الهضمي.
• بينظّم السكر في الدم.
• بيساعد في علاج التهابات المعدة والقولون.
• مفيد في حالات كسل الغدة الدرقية.
• بيقلل من الصداع المزمن.
• وكمان بيساعد في تحسين الخصوبة عند الستات والرجالة.
بس زي أي حاجة ليها فوائد، ليها برضو مخاطر، وخصوصًا لو اتاخدت بطريقة غلط.
فيديو مهم عن القسط الهندي من هنا:
طب إزاي بيساعد القسط الهندي في تأخر الحمل؟
القسط الهندي بيشتغل كمضاد للالتهاب ومعدّل للمناعة، يعني ممكن يفيد في حالات زي:
• الحساسية أو المشاكل المناعية.
• بعض الدراسات بتقول إنه ليه تأثير ضد الأورام، وبيخفف من آثار العلاجات الكيميائية.
• بيقلل الالتهاب المزمن في الجسم، وده بيساعد على تحسين جودة البويضات، خصوصًا في حالات زي تكيس المبايض أو البطانة المهاجرة.
• كمان بيساعد على تحسين جودة الحيوانات المنوية، وخصوصًا في حالة تكسّر الحمض النووي (DNA fragmentation) اللي بتسبب عقم عند الرجالة.
ومش بس كده… ليه علاقة بالغدة الدرقية والسكر كمان
لو عندك خمول في الغدة الدرقية بسبب المناعة الذاتية، القسط ممكن يساعد. بس مش كل حالات الغدة ينفع تستخدمه، فلازم تكوني عارفة نوع المشكلة.
وبرضو بيساعد على تنظيم الدهون في الجسم، وكفاءة الكبد في تخزين الجليكوجين، وده بيحسّن استجابة الجسم للإنسولين، وبيفيد مرضى السكر.
طيب فين المشكلة؟
المشكلة في الاستخدام العشوائي.
لو خدتيه بجرعات غلط أو بدون إشراف، ممكن يعمل العكس تمامًا:
• ممكن يأثر على جودة وعدد الحيوانات المنوية.
• ممكن يقلل الخصوبة بدل ما يساعد.
• في بعض الحالات، ليه تأثير مضاد للخصوبة، وده معناه إنه ممكن يمنع الحمل بدل ما يساعد على حدوثه.
طب إيه هي الجرعة الآمنة؟ وهل ينفع لكل الناس؟
للأسف مافيش جرعة واحدة تنفع لكل الناس. الجرعة تعتمد على الوزن والحالة الصحية. بعض الأبحاث قالت إن الجرعة الآمنة ممكن تكون حوالي 400 ملغ لكل كيلوجرام من الوزن، بس برده ده لازم يتحدد تحت إشراف طبي.
وكمان في حالات مينفعش تستخدم القسط الهندي من غير استشارة طبيب، زي:
• اضطرابات الهرمونات.
• أمراض الكبد.
• أي مرض مزمن.
طيب إمتى ممكن فعلاً يفيد؟
• لو عندك ارتفاع في هرمون الإستروجين (زي تكيس المبايض).
• لو هرمون FSH عالي، بس لازم الجرعة تكون محسوبة.
• لو الزوج بيعاني من ضعف في السائل المنوي أو تكسّر في الـDNA.
في النهاية …
القسط الهندي مش مجرد عشبة بتتباع في العطار. هو مادة فعالة قوية، وممكن يكون مفيد فعلًا… بس كمان ممكن يضر لو استخدمناه غلط.
فكرة إن “صاحبتي جربته وقالتلي عليه” مش كفاية. كل جسم له طبيعته، وكل حالة لها ظروفها.
الأعشاب مش دايمًا بديل آمن، لكنها علاج تكميلي محتاج إشراف ووعي. وكل حاجة ليها تأثير قوي، لازم كمان نعرف تأثيرها الجانبي.
ولو بتدوري على معلومات علمية دقيقة ومنظمة عن تأخر الحمل، جمعنالك كل المواضيع في دروس متكاملة، علشان تساعدك توصلي لحلم الأمومة اللي بتتمنيه:
رسالة لكي من بطلات سبقوكي لتحقيق حلم أمومتهم – TBIBTY طبيبتي