مشروب رمضاني هيساعد نسب الخصوبة عند السيدات والرجال
في وسط موائد رمضان العامرة، وعلى سفرتنا اليومية، بيظهر معانا مشروب ماحدش بياخد باله منه أوي، رغم إن تأثيره ممكن يكون أقوى من أي وصفة علاجية! المشروب ده مش بس لذيذ ومنعش، لكن كمان ممكن يكون مفتاح جديد في رحلة علاج تأخر الإنجاب. معاكم النهاردة وهنحكي النهاردة عن بطلنا اللي اسمه التمر الهندي أو بالإنجليزي “Tamarind”.
توضح دكتورة “ريهام الشال”، أخصائي طب وجراحات النساء والتوليد وتأخر الإنجاب والحقن المجهري، إن الأبحاث أثبتت إن التمر الهندي بيحتوي على مجموعة قوية من القيم الغذائية اللي تفرق فعلًا في مسألة الخصوبة. وأهم نقطة بيشتغل عليها هي الميتوكوندريا، اللي بنسميها “الموتور بتاع الخلية”، زي موتور العربية بالضبط، هو اللي بيدّي طاقة للخلايا، ولما يشتغل بكفاءة، الجسم كله بيشتغل بكفاءة.
وده بيؤدي لحاجتين مهمين جدًا:
1. تحسين معدلات الحرق.
2. تقليل مقاومة الإنسولين.
وده معناه ببساطة إننا بندي الجسم فرصة يحرق السكر بشكل أفضل، وبالتالي فرص الشفاء من تكيس المبايض بتزيد، واللي هو من أكتر الأسباب اللي بتمنع الحمل.
طب والرجالة؟ هل ليهم دور؟ طبعًا. التمر الهندي لما يحسن الحرق، بيزود طاقة الجسم، وده بيأثر بشكل مباشر على حركة الحيوانات المنوية وجودتها. يعني فرص الحمل مش بس بتزيد عند الزوجة، لأ، ده الزوج كمان بيستفيد.
لمشاهدة الفيديو من هنا: https://youtu.be/-VgCUE9Q75s?si=yoOxW4LgfwSvoNG5
ثاني فايدة للتمر الهندي هي إنه غني بـ”فيتامين C” و”الزنك”، ودي عناصر أساسية كمضادات أكسدة. وافتكروا معايا إن مضادات الأكسدة دي هي اللي بتحمينا من الشوارد الحرة اللي بتسبب التهابات، زي:
• بطانة الرحم المهاجرة.
• تكيس المبايض.
• والتهابات تضعف الحيوانات المنوية عند الرجال.
فبالتالي، أي شيء يقاوم الشوارد الحرة، هو بيحمي الخصوبة عند الطرفين.
ثالث فايدة مهمة جدًا هي إن التمر الهندي فيه “بوتاسيوم”، وده العنصر المسؤول عن انقباض وانبساط الأوعية الدموية. وده مش بعيد عن اللي شرحناه قبل كده في فيديو الـL-Arginine، بس بأسلوب مختلف. اللي بيحصل هنا إن تدفق الدم بيكون أحسن للأعضاء التناسلية، سواء المبيضين أو الخصيتين، وبالتالي جودة البويضات والحيوانات المنوية بتتحسن.
رابع فايدة، وهي الماغنيسيوم! التمر الهندي فيه حوالي 110 ميليجرام من الماغنيسيوم، وده عنصر بيشتغل على تقليل الكورتيزول، أو “هرمون التوتر”، وبيساعد العضلات على الاسترخاء. وبالتالي، الحالة النفسية بتتحسن، والتوتر اللي ممكن يأخر الحمل بيقل.
خلينا نسأل نفسنا: هو التوتر لوحده ممكن يمنع الحمل؟ أيوه، للأسف. التوتر والقلق ممكن يقللوا فرص الحمل بشكل كبير. وده السبب اللي بيخلينا دايمًا نقول: “عايزين بابا وماما يكونوا مبسوطين ورايقين، مش متوترين!”
خامس حاجة بقى، واللي ماحدش بياخد باله منها، هي إن التمر الهندي بيقاوم البكتيريا والفطريات، وده معناه إنه:
• بيقلل التهابات المهبل عند السيدات.
• بيقلل الصديد في السائل المنوي عند الرجال.
وده بيساعد كتير من الحالات اللي ممكن تتعالج بدورة واحدة بس بعد ما الالتهاب يخف، فتتحسن الخصوبة وييجي البيبي في سلام.
لكن للأسف، كل الفوائد دي ممكن نضيعها بإيدينا! لما نضيف نص كيلو سكر على التمر الهندي، إحنا بنقتل كل الفوائد اللي لسه متكلمين عنها. إحنا بنقول إنه بيقلل مقاومة الإنسولين، وإنت بتزود مقاومة الإنسولين! فلو عايزين الفايدة، لازم نشربه من غير سكر.
طب نحضره إزاي بطريقة صحيحة؟
• ممكن تشربيه كمشروب بارد أو دافئ، بس يفضل تقللي تعرضه للحرارة علشان ميفقدش فوائده.
• ممكن نستخدمه مطحون كتوابل على السمك بعد ما يستوي.
• أو ندخله في شوربة العدس، وده هيكون مزيج ممتاز لأنه العدس غني بالأرجنين اللي برضه بيساعد في تحسين الخصوبة.
واللي عايز يزود التأثير؟ ممكن نضيف عليه الجينسينغ والمكا، وده هيعمل خلطة خصوبة قوية جدًا. بس خدي بالك، لازم تحت إشراف طبي، لأن حتى الأكل ممكن يكون له أعراض جانبية.
وآخر حاجة، ما تتوقعيش نتائج فورية من أول أسبوع. علشان نوصل لتأثير فعلي على الخصوبة، بنحتاج على الأقل خمس شهور من الانتظام على التمر الهندي ضمن نظام صحي متكامل.
وافتكروا، كل خطوة بنمشيها بهدوء وعلم، هي خطوة أقرب لحلم الأمومة.
وكل حاجة حلوة بتبدأ من معلومة صح.
ولو بتاعني من تأخر الإنجاب، جمعنا لك هنا كل الموضوعات الخاصة بتأخر الحمل في دورس مفصلة بمعلومات علمية موثقة ومرتبة، علشان نساعدك توصلي لحلم الأمومة اللي تستحقيه:
رسالة لكي من بطلات سبقوكي لتحقيق حلم أمومتهم – TBIBTY طبيبتي