إزاي العروسة الجديدة تعرف إنها حامل؟
سؤال مهم جدًا بيسئلوا بنات كتير بعد الجواز، خصوصًا في أول شهور الزواج: “إزاي أعرف إني حامل؟” أو “هل فيه علامات واضحة؟” أو حتى “أنا خايفة أكون حامل ومش واخدة بالي… أعمل إيه؟”.
دكتورة ريهام الشال اخصائي طب وجراحات النساء والتوليد والحقن المجهري وتأخر الإنجاب تقول: الحقيقة إن أول فترة بعد الجواز بيكون فيها خلط كبير ما بين التوتر، والفرحة، والتوقعات، والسؤال اللي بيتكرر من كل الناس حواليكي: “هاه؟ في جديد؟ فيه بيبي؟”. وده ممكن يضغط على نفسيتك ويحسسك إنك لازم تعرفي بأسرع وقت.
لكن خليني أقولك حاجة مهمة جدًا… الحمل مش محتاج إننا نعيش أول شهر فيه بخوف ولا قلق. الموضوع بسيط أكتر مما تتخيلي. والقاعدة الذهبية اللي ممكن تختصر عليكِ كل الحيرة هي: راقبي ميعاد دورتك الشهرية.
يعني إيه؟
يعني أول خطوة لازم تعمليها بعد الجواز إنك تبدأي تكتبي وتتابعي مواعيد الدورة الشهرية بتاعتك. عارفة أيام ما كنتي بنوتة وبتنسي جات إمتى؟ الموضوع هنا مختلف. لأن أول إشارة ممكن تديك احتمال حدوث حمل هي إن الدورة تتأخر عن معادها المعتاد.
لو كانت الدورة بتيجي مثلًا يوم 3 في الشهر، ولاقينا نفسنا عدينا اليوم ده ومفيش دورة… ساعتها نبدأ نهدي اللعب شوية. نقلل المجهود، نريح نفسنا، ونبعد عن أي حاجة ممكن تجهد الجسم أو تخلينا نندم لو طلع في حمل فعلاً.
لمشاهدة الفيديو من هنا: https://youtu.be/JkpslBkhSS8?si=7TsX0LKPhWcmdnAC
طيب وبعدين؟
اليوم اللي بعد تأخر الدورة، ممكن ببساطة تعملي اختبار حمل منزلي. مش محتاج تحليل دم ولا تروحي معمل من أول يوم. اختبار البول المنزلي سهل، متوفر في الصيدليات، وبيبان عليه الحمل غالبًا بعد أول يوم تأخير. لو طلع سلبي ولسه الدورة ما نزلتش، ممكن تعيدي الاختبار تاني بعد يومين أو تلاتة.
بس كده؟
آه، والله! مش لازم تفضلي كل شوية تراقبي جسمك وتفتكري: “أنا حاسة بإيه؟ بطني بتوجعني؟ صدري واجعني؟ بنام كتير؟”، لأن الأعراض دي ممكن تكون عادية جدًا أو حتى وهمية. ومش كل واحدة بتحمل بيكون عندها نفس الأعراض. في واحدة تحس من أول يوم، والتانية ما تحسش خالص غير لما تعمل التحليل.
النصيحة اللي تهمك دلوقتي هي إنك تعيشي حياتك بهدوء.
انبسطي، افرحي بالجواز، اتأقلمي على حياتك الجديدة، وما تحمليش نفسك فوق طاقتها. لأن الضغط النفسي ممكن يأخر الحمل، وممكن يخلي جسمك يتصرف بطريقة غريبة. كل حاجة بتيجي في وقتها اللي ربنا كاتبه، فلا تقلقي ولا تحملي هم.
وفي نقطة كمان مهمة أوي. ما تسمعيش لكل نصيحة عشوائية. بلاش “اعملي مشروب كذا”، أو “خدي خلطة كذا”، أو “نامي على جنبك اليمين بعد الجواز”. دي كلها خرافات مش مبنية على حاجة علمية. خليكي دايمًا ماشية ورا المعلومة الصح، واسألي دكتورتك أو طبيبتك اللي بتثقي فيها.
ولو بتاعني من تأخر الإنجاب، جمعنا لك هنا كل الموضوعات الخاصة بتأخر الحمل في دورس مفصلة بمعلومات علمية موثقة ومرتبة، علشان نساعدك توصلي لحلم الأمومة اللي تستحقيه:
رسالة لكي من بطلات سبقوكي لتحقيق حلم أمومتهم – TBIBTY طبيبتي